Kechiba OMNI? Greek oshi nung ‘OMNIA’ ojang “All” ta shia angutsü koba tetetzu “Ajak”. ‘SOFIA ‘ Greek oshi nungjisa “Wisdom” koba dang “shisatsü” ta shia angur. Anungji Laishiba ya Tsüngremer shisatsü ajak nugtetba kaket asü nung tanur ka asoshi Temeshi Lai otsü tongmelang saka temulong agi koka aser bilemteta aintsü nükla nung noksa dena iba App nungja agutsür.  Iba ama App ka lapokba ya tanurtem asoshi asen oshi nung mezüngbuba asütsü.

Anungji terasa kar ajanga OMNI SOFIA rajem indang khuli agutsür:

1. Labor of love (labor omnia vincit)

Iba yagi sayur asen Tsüngrem temeim agi sünga aliba aser pa alima nung alidang koda mapa agi inyaka sayu item kulitem ajak Laishiba nung shia aliba ochi tesayuba lir.

2. Virgil… Not capable of all, vulnerability (Non omnia possumus omnes)

Tsüngrembo temeshi aser tabensa saka meimchirtembo ajak tapensa masü kechiyong ajaki temenen mena aser Tsüngrem sentsüwangshi matong. Anungji Laishiba züluba nisunger tashi aser shisatsü nung dang züngra ashiko aiben tanurtem aibendaktsür aser angazüktsü nunga nokdanger adar. Anungji kodang Yisu Khrista tanaben alimai Pa chirtem agizuktsü arudir idangjiang tabensaba akümtsü. Meimchirtem mabensaba tabensa kümdaktsütsü Khrista Yisu dangi anogo shia asen menen bener künüa mati Pa sülen anitaker kaka akümtsü jangratsüla.

3. Change (Onnia munantur)

Küm 2000 dang tema Yisui Tejen Lai tesayuba nungi Tasen Lai tesayuba temelenshi bener arutsü.  Temelenshi ta asüba olen ya kanga temela masü saka Tsüngrem tashi ajanga temelenshi taküm, temelenshi tamang jenjang nung chirnurtem anitetsü tanu asen khuret lir. Iba temelenshiji ana nungi akanger.

4. Love conquer all (Omnia vincit amor)

Alima nung tanurtem aika temeim ta asüba taküm nung majangshii alima nung kanga ala-a shiba aser kibong, lokti tashidak timtem aika ajanga temeim samar tejashi tulu nung aliba aika lir.  Item asoshi Tsüngrem temeim nungdaker aser parnok asoshi Laishiba nung temeim o miima aliba ashitsü koda tongtipang. Temeimibo ajak akoker aser temeim kodanga majener. Tsüngrembo temeim anungji Pa dangi arua temeim talubu agitsü asen chirnurtem dang ashitsü melakli.

5. Completeness (Opera omnia)

Kodang mapa ka tenzükdir tatempangji arulanglang. Kodang Tsüngremer sayatenya mapa tanur taküm shia nung tenzukdir pa/la asoshi Tsüngrem tashi atenba palaka alitsü. Tongtipangsa parnok taküm nung Yisu agizükba aser tanaben tenenen nungi meyipdir taküm tasen akümer aser pa/la asoshi Tsüngrem akhümtsübuba atokdaktsür. Khrista akaba ajanga taküm nung mata mabensa liaka tanula nung tabensa kümdaktsür.

6. Vanity (Omina vanitus)

Alima küra ainba indang jembiba agi masü saka joko asen nüki ngua alima yimsoshiba, libaliro aser taküm jaklaliru akhi ama masü saka tasen sabuba aser tasen jangraba putu kati menepoko. Yimya masüba mapa agiang tanu tanurtem jangratemdaktsür. Iba yagi sayur aseni metetba aser aseni jangraba asen chirnurdang sayuba nung aiben parnoki jangramatemer aser teyakyak melii akümer, anungji aiben anati jangraba agibo lakteter saka Tsüngrem o bo tejen makümer. Hallelujah…..  Ya koda tesüngmangtsü!

7. Truth (Omnia virtas)

Khristan tamang ya ochi nung anemdaker yangera lir. Laishiba ochi tesayuba, ochi nung amangtetba aser ochiba agi tasür shia arutsü aser ochi nung Yisu tanaben alimai pei nubor agizüki arutsü. Kin ka, Arogo aser Lokti ajak ochi nung amendaker ora alima nung Kodak mesüka yangertsü. Ochiba sayutsü asoshi na aser ni ya hadir ka ama Tsungremi amshiner.

8. Ready for everything (Omnia paratus)

 Tanur shia tareprangtsü palala, yimya palala, sempet palala aser tejangraba palala, tagatetba palala saka Tsüngrem tanela ka aser Laishiba tesayuba ka kübok angazüktsü meji iba “OMNi SOFIA APP” ABAM Literature& Education Children Ministry anepalua atoker. Biblical virtual pictorial stories ya asen oshi nung renloktsü kanga tongtipang ta angateta shilem ishika agiteta menüngloker adoker. Iba App nung maneni Lai tesayuba dena ennoka aotsü tebilemba lir. Iba “OMNIA SOFIA APP” ajanga tanurtem ajak temoatsü angutsü ajak sarasadem südi.